April 27, 2014

क्रस कल्चरल कन्सर्ट

लन्डन, चैत्र ११ – नेपाली कलाकारले नेपाली गीत गाउनु/बजाउनु नौलो भएन । नेपालीले कन्सर्टतिर विदेशी गीत पनि गाएकै हुन् । तर, हालैको साँझ मध्य लन्डनको लिभरपुल स्टि्रटस्थित एउटा ऐतिहासिक गिर्जाघरमा पृथक् सांगीतिक कार्यक्रम भयो । सीमित दर्शकमाझ नेपाली कलाकारले सदाबहार नेपाली गीत अनि विदेशी संगीतकर्मीहरूले ती गीतमा सुमधुर संगीत भरेर अढाइ घन्टा बेग्लै सांगीतिक स्वाद प्रस्तुत गरे ।

‘क्रस कल्चरल ग्लोबल म्युजिक’ सांगीतिक समूहले कन्सर्ट गरेको हो । समूहका संस्थापक गायक, गिटारिस्ट एवं कम्पोजर गंगा थापा शारीरिक रूपमा अपांग छन् तर उनको प्रस्तुतिमा कसैले खोट देखेनन् । उदीयमान गायिका दिव्यानी शर्माको साथमा थापाले कहिले दर्शकलाई रोधीघर र भञ्ज्याङ चौतारी पुर्‍याए त कहिले तामाङ सेलो अनि सोरठी गाएर मातृभूमि स्मरण गराए । ‘ए कान्छा…’ होस् वा ‘घिन्ताङ घिन्ताङ’…,’ कालजयी गीतहरू निरन्तर सुन्न पाउँदा श्रोताहरू थामिनै सकेनन् । युनिभर्सिटी अफ लन्डन, सोआसबाट इथ्नो म्युजिकोलोजीमा ग्रयाजुएट थापा गाउँदै गर्दा क्रस कल्चर म्युजिकले संस्कृति आदानप्रदान र विश्वस्तरमा नेपाली पहिचान झल्कने पनि बताइरहेका थिए ।

आधा दर्जन एकल एल्बम ल्याइसकेकी लन्डनवासी गायिका सितु खरेलले बैरागी भैरव रागमा आधारित शास्त्रीय गीत ‘धेरै भूल मैले गरें…’ प्रस्तुत गर्दा ‘वान्स मोर’ सुन्ननुपर्‍यो । भूपू बि्रटिस लाहुरे गणेश पुनले सुरुतिर सिकारुको चिनारी दिए पनि दुई गीत गाइसकेपछि भने तारिफ गर्नेको कमी भएन । अफ्रिकी मूलका ड्रमर सेइमी डी, लन्डनका व्यस्त स्याक्सोफोन वादक जोन मार्टिन अनि रोबिइन हेमिन्स -डबल बास) का साथ तबला एवं मादल वादक सनुज थापाले करिब डेढ दर्जन नेपाली गीतमा जोडदार संगीत प्रस्तुत गरे । ‘संगीतलाई भूगोल र भाषाले नछेक्ने रहेछ,’ गायक विवेक श्रेष्ठ तारिफ गर्दै थिए, ‘धेरै तडकभडकबिना पनि पृथक सांगीतिक रमाइलो भयो ।’

यस्ता कार्यक्रम बेलाबेला भइरहे नेपाली संगीतको प्रवर्द्धनमा सहयोग पुग्ने ठान्छन् सञ्चारकर्मी सुमन खरेल । रेडियोकर्मी आशा पुनले कार्यक्रम सञ्चालनको प्रारम्भमै नेपाली संगीतलाई विश्व रंगमञ्चमा पुर्‍याउनु र नेपाली गीत-संगीत प्रवर्द्धन गर्नु कार्यक्रमको उद्देश्य सुनाएकी रहेको थिइन् ।

Source : eKantipur